Ekonomia u tkurr 3.3 %, INSTAT: Ndikimi nga pandemia, efektet u zbutën në fund të vitit 

Ekonomia shqiptare pësoi një recesion 3.3 për qind në vitin 2020. Krahasuar me pritshmëritë e qeverisë dhe institucioneve ndërkombëtare, tkurrja e ekonomisë rezulton në nivele më të ulëta, ndërsa parashikimi për këtë vit flet për rritje 5.5 për qind.

Ekonomia shqiptare ka pësuar një recesion në nivelin 3.31% gjatë vitit 2020, vit i cili u shoqërua nga pasojat e tërmetit dhe pandemia COVID-19. Pavarësisht pritshmërive, tkurrja e ekonomisë rezulton në nivele më të ulëta, sesa ajo që parashikonin institucionet financiare ndërkombëtare, që llogarisnin recesion nga -6% deri në -9%.

Sipas Institutit të Statistikave, ndikim në këtë nivel ka dhënë tremujori i fundit, i cili rezultoi me rritje prej 2.99%. Sektorët më kontribut pozitiv ishin ndërtimi, i nxitur nga procesi i rindërtimit, por edhe shëndetësia e cila njohu rritje të ndjeshme të shpenzimeve.

Fillimi i vitit 2020 ishte i vështirë dhe nisi më rënie për shkak të efekteve të tërmetit. Më pas në 3 mujorin e dytë ekonomia ishte nën masat e forta të izolimit, ndërsa në 3-mujorin e trete u ndikua sezoni turistik.

Ndërkohë, fundi i vitit përkoi me kulmin e infektimeve nga pandemia, por masat kufizuese u zbutën dhe ekonomia u gjallërua. Për Ministrinë e Financave, viti 2021 do të shënojë rritje ekonomike në nivelin 5.5 %.