Ekrem Imamoglu në burg, zgjidhet kryebashkiaku i përkohshëm i Stambollit

Këshilli i Qytetit të Stambollit zgjodhi Nuri Aslan nga partia opozitare si kryebashkiak në detyrë të mërkurën, pas arrestimit të kryetarit të Stambollit Ekrem Imamoglu, njoftoi Bashkia e Stambollit.

Aslan, kandidati i opozitës kryesore, Partia Popullore Republikane (CHP), udhëhoqi votimin në dy raundet e para, por nuk arriti të sigurojë shumicën e kërkuar.

Në raundin e tretë, ku duhej një shumicë e thjeshtë, Aslan u zgjodh me 177 vota. Rivali i tij, Zeynel Abidin Okul nga Partia për Drejtësi dhe Zhvillim (AKP) në pushtet, mori 125 vota.

Aslan ishte emëruar më parë si nënkryetar i parë i bashkisë nga Këshilli Bashkiak i Stambollit më 15 prill 2024.

Aslan u zgjodh kryebashkiak i përkohshëm i Stambollit për të zëvendësuar Ekrem Imamoglu. Ky zëvëndësim ishte i domosdoshëm pas burgosjes së Imamoglut, i cili akuzohet për korrupsion. Kryetari i përkohshëm do të drejtojë qytetin për pjesën e mbetur të mandatit të Imamoglu, ndërsa ai pret gjykimin e tij.

Nuri Aslan ka lindur në vitin 1969 në Sivas, Turqi. Ai studioi në Universitetin Teknik Yildiz, ku u diplomua në fakultetin e inxhinierisë për arkitekturë detare dhe inxhinieri mekanike. Pas përfundimit të studimeve, ai filloi një karrierë në sektorin privat, duke shërbyer në fund si drejtor i përgjithshëm i një kompanie private.

Në prill 2024, ai u zgjodh nënkryetar i parë i Bashkisë Metropolitane të Stambollit me 184 vota, duke mundur kandidatin e Partisë për Drejtësi dhe Zhvillim (AKP), Ahmet Bilal Kıgmaz, i cili mori 129 vota.

Eksperienca e Aslanit në pushtetin vendor dhe organizata të ndryshme qytetare – së bashku me marrëdhënien e ngushtë që mban me kryebashkiakun e arrestuar – e bën atë një figurë kyçe në këtë periudhë tranzicioni.

Imamoglu u arrestua më 19 mars, dhe më pas u arrestua zyrtarisht dhe u pezullua nga detyra për akuza korrupsioni të dielën. Që atëherë, Imamoglu, i cili mohon akuzat, është mbajtur në burgun Marmara në lagjen Silivri të Stambollit.

Imamoglu, nga CHP, fitoi një mandat të dytë si kryebashkiak i Stambollit në mars 2024, duke mundur kandidatin e AKP-së, Murat Kurum.

LEXONI GJITHASHTU:

• Në Turqi mbahen protesta të ashpra pas burgosjes së kryebashkiakut të Stambollit
• Gjykata turke urdhëron burgosjen e kryebashkiakut të Stambollit