Ekskluzive/ Autorët e vrasjes së dyfishtë në Elbasan, qitës profesiontë të maskuar me paruke

Vrasja e dyfishtë në Elbasan, ku humbën jetën Ardian Çollaku dhe Lulzim Bitri dyshohet është kryer nga 2 persona, të cilët kanë qëlluar me armë zjarri tip “Tomson” dhe pistoletë në drejtim të viktimave.

Euronews Albania mëson se pjesë e atentatit kanë qenë 3 persona, të cilët ndodheshin brenda makinës tip “Volvo”, por vetëm 2 prej tyre kanë hapur zjarr ndaj viktimave.

Autorët dyshohet se kanë përdorur paruke për t’u kamufluar, ndërsa mësohet se automjeti ka lëvizur edhe më herët në zonë për të lokalizuar viktimat.

Qitësit dyshohet se janë vrasës profesionistë me pagesë për shkak se janë treguar mjaft preciz në eliminimin e Çollakut dhe Bitrit, duke mos lënduar personin e tretë që ndodhej pranë tyre në momentin e atentatit.

Në automjetin “Volvo” që u dogj në fshatin Balldre, policia gjeti në brendësi edhe një kallashnikov që nuk është përdorur në ngjarje.

Grupi hetimor i ngritur për vrasjen e dyfishtë ka administruar edhe pamjet filmike të karburantit ku ndodhi ngjarja.

Pista kryesore e ngjarjes së rëndë mbetet e shkuara me ngarkesë kriminale e viktimave.

Për Lulzim Bitrin, krahas lidhjeve të afërta me Talo Çelen, po hetohet dhe mundësia e një hakmarrje, pasi i vëllai i tij ka dyshime se ka qenë vëzhgues në vrasjet e Endrit Alibejt, Arben Dylgjerit dhe një shtetasi turk.

Sakaq për Ardian Çollakun dyshimet lidhen me përfshirjen e tij si person në dijeni për vrasjen e Everest Cakës në 11 maj të 2021.

LEXONI GJITHASHTU:

• 3 persona dyshohet se kryen atentatin me 2 viktima në Elbasan
• Atentati në Elbasan, humb jetën në spital Ardian Çollaku
• Atentat në Elbasan, një i vrarë, tjetri në gjendje kome