Ekspertët: Keqinformimi rreth perimenopauzës në mediat sociale po vë gratë në rrezik

Ekspertët kanë thënë se keqinformimi në lidhje me perimenopauzën po i vë gratë në rrezik për shtatzëni të padëshiruara, medikamente dhe diagnoza të panevojshme.

Ndërsa një numër gjithnjë e në rritje grash hasin informacione mashtruese në mediat sociale, ka shqetësime se disa prej tyre mund të çohen në përfundime të gabuara që mund të errësojnë vështirësitë reale shëndetësore.

“Të gjithë mendojnë se janë në menopauzë. Pra, po shohim gra gjithnjë e më të reja që kërkojnë HRT kur ajo që u nevojitet është kontracepsioni hormonal, pasi ato janë ende pjellore.

Unë punoj në një shërbim aborti dhe po shohim më shumë gra mbi 35 vjeç që besojnë se janë në menopauzë dhe janë të habitura kur mbeten shtatzënë”, tha Dr. Paula Briggs, një konsulente në shëndetin seksual dhe riprodhues.

Sipas Shoqatës Britanike të Menopauzës (BMS), më shumë se 80% e grave do të jenë në menopauzë deri në moshën 54 vjeç – që do të thotë se ato nuk kanë pasur cikël për 12 muaj ose më shumë – me rreth 5% të grave që arrijnë në menopauzë para moshës 45 vjeç.

Por menopauza nuk është një ndërprerje e papritur: përkundrazi, gratë përjetojnë një tranzicion, të njohur si perimenopauzë, gjatë një periudhe muajsh ose vitesh.

Gjatë kësaj kohe nivelet e hormoneve luhaten dhe mund të rezultojnë në simptoma të tilla si një ndryshim në modelet menstruale, afshe të nxehta dhe vështirësi në gjumë. Briggs tha se dezinformimi rreth perimenopauzës është shqetësues.

“Shikoj gjëra si Instagram-i për të parë se ndaj çfarë ekspozohen dhe tmerrohem”, tha ajo, duke përmendur shembuj të grave në të 30-at të cilave u është thënë të kërkojnë HRT nëse nuk janë në gjendje të flenë ose kanë probleme me migrenën dhe të ndërrojnë mjekun e familjes nëse refuzohen. Ose grave të cilave u është thënë se duhet të kërkojnë trajtim me testosteron.

“Nuk jam kundër asnjërës prej këtyre gjërave tek personi i duhur, por femrat e prodhojnë testosteronin e tyre gjatë gjithë jetës, madje edhe gratë pa vezore, kështu që ideja që të gjithë duhet të kërkojnë testosteron është e çmendur”, tha Briggs.