Eksperti Hoxhaj: Vëmendja e NATO-s në rajon faktor stabiliteti, BE duhet të angazhohet në të njëjtën linjë

Andi Hoxhaj, ekspert i të drejtës evropiane tha për Euronews Albania se angazhimi i NATO-s në Ballkanin Perëndimor është i rëndësishëm dhe i mirëpritur, pasi do të krijonte stabilitet dhe qëndrueshmëri, por kjo sipas tij nuk mjafton nëse as Bashkimi Evropian nuk angazhohet po njësoj për integrimin e rajonit.

“Vëmendja e NATO-s në rajon është faktor për stabilitet, por edhe Bashkimi Evropian duhet të ndjekë të njëjtën linjë në rajon. Është shumë pozitiv angazhimin i administratës Biden në Ballkanin Perëndimor dhe perspektivës evropiane dhe kjo ndryshon totalisht nga administrata Trump.

Edhe vendet e BE e kanë kuptuar se procesi i integrimit të rajonit është zvarritur”, tha z. Hoxhaj.

Sipas tij, rikthimi i SHBA në Samitin e NATO e sjell atë si një Amerikë më të angazhuar sa i përket të drejtave të njeriut, por sa i përket marrëdhënieve me Kinën është në një linjë me administratën e kaluar, ndërsa sa i përket marrëdhënieve me Rusinë është një rikthim në politikën e saj të jashtme.