Eksperti: Talo Çela në qendër të Tiranës pranë një komisariati, policia nuk veproi

Eksperti i sigurisë, Ilir Alia thotë se i shumëkërkuari Talo Çela është parë në një zonë pranë qendrës së Tiranës, afër së cilës ndodhet një komisariat policie, por sërish nuk është vepruar ndaj tij.

Në një intervistë për “Euronews Albania”, Alia u shpreh se ka pikëpyetje në lidhje me punën e policisë dhe rrjedhjen e informacioneve për personat në kërkim.

“Prokuroria në radhë të parë thotë që kemi cënim të informacionit të klasifikuar, nuk po thotë që po mbrojmë informatorët. Prokuroria duhet të interesohet më tepër te ato që nuk kanë arritur t’i ruajnë këto informacione, sesa te mediat dhe gazetarët që i bëjnë publike këto. A ka interes publik për t’i ditur këto informacione? Sigurisht që ka. Kemi rastin që një i shumëkërkuar nga drejtësia shqiptare lëviz në qendër të Tiranës.

Zona ku është i informuar policia që është parë personi, aty afër ka dhe një komisariat policie dhe askush  nuk ka vepruar. Këtu lindin shumë pikëpyetje lidhur me punën e policisë dhe në atë që a rrjedhin informacione nga policia për personat në kërkim”, theksoi ai.

LEXONI GJITHASHTU

• Gazetari tregon detajet: Në Shqipëri qarkullon drogë sintetike, ekstazi

• Talo Çela gjithmonë ka lëvizur lirshëm, thotë gazetari