Ekspozitë në Sarandë për viktimat e regjimit komunist, familjarët apel për gjetjen e eshtrave

Në Sarandë dhe Gjirokastër, si zona kufitare me Greqinë numërohen me qindra të zhdukur gjatë regjimit komunist. Në kujtim të tyre, një ekspozitë me foto dhe histori u mbajt në rrugët e qytetit të Sarandës, duke risjellë dramën që la pas regjimi.

Ende pa një statistikë të saktë se sa janë të zhdukurit dhe të vrarët, familjarët bëjnë apel për gjetjen e eshtrave.

“Merak është se deri më tani nuk është bërë asgjë për gjetjen e eshtrave të tyre, të qetësohen dhe familjet e tyre që kanë humbur njerëzit. Kjo mund të bëhet nga qeveria, nuk ka shumë shpenzime”, u shpreh Spiro Rexho, i dënuar gjatë rrëgjimit komunist.

Gjatë komunizmit nuk pati vetëm shqiptarë të vrarë.

Stanislav Zyber nga Polonia, i cili krijoi hartën e gjeologjisë shqiptare, është një prej viktimave që u arrestua dhe u ekzekutua nga strukturat e regjimit.

“Është dhe figura e Stanislav Zyber, një figurë e njohur për gjeologjinë shqiptare. Ai ka pasur një fat tragjik. Kur erdhi Partia Komuniste në pushtet, atij i kërkonin ku ka flori. Ai thoshte që këto janë hartat. Mirëpo, ata e gjuajtën me shkelm në kokë dhe ai vdiq. Kështu ka dëshmuar dhe Petro Marko që ka qenë shok qelie me të”, tha Ajkana Toni.

Kohët e fundit disa institucione shtetërore po intensifikojnë aktivitetet për dokumentimin e krimeve të komunizmit, megjithatë do të duhet kohë që ky proces të hedhë dritë mbi atë çka ka bërë regjimi në vendin tonë.

“Ne kemi krijuar tashmë hartën ku janë kryer ekzekutimet sipas deponimeve te familjarëve. Megjithëse na mungon një shifër për Sarandën. Pastaj presim një marrëveshje bashkëpunuese me Institutin e Policisë Shkencore, Institutin e Antropologjisë, të cilët kanë pjese në proces që ka të bëjë më identifikimin, sqarimin e rrethanave dhe është proces i komplikuar” u shpreh Gentiana Sula, kryetare e Autoritetit per Informimin mbi dokumentet e sigurimt të shtetit, teksa shtoi se kjo procedurë do të kërkojë kohë.

LEXONI GJITHASHTU:

• Shkarkohet nga detyra Shefi i Komisariatit të Sarandës
• “Keni 100 ditë kohë”, kryeministri Rama paralajmëron ristrukturim të policisë së shtetit
• Ministri Çuçi paralajmëron ndryshime rrënjësore në polici: Disa gjyqtarë po nxjerrin kriminelë nga burgu