Ekzekutimi i Ahmet Toskës në Fier, policia arreston autorin e dyshuar

Policia ka arrestuar autorin e dyshuar të vrasjes së Ahmet Toskës, ngjarje e ndodhur më 26 tetor në qytetin e Fierit. Policia bën me dije se është arrestuar 52-vjeçari Fatmir Hoxhaj. Mbi këtë të  fundit rëndojnë dy vepra penale “Vrasje me paramendim” dhe “Mbajtje pa leje të armëve dhe municionit luftarak”.

“Nga Sektori për Hetimin e Krimeve të Rënda në DVP Fier, në bashkëpunim me Prokurorinë e Rrethit Gjyqësor Fier, në lidhje me ngjarjen e ndodhur në datë 26.10.2020, ku në lagjen “Sheq i madh”, Fier është vrarë me armë zjarri shtetasi A. T., 50 vjeç, pas një pune të mirë-organizuar dhe hetimeve të pandërprera, është arritur të behet kapja dhe ndalimi i autorit të dyshuar:

F. H., 52 vjeç, banues në Fier. Prokuroria pranë Gjykatës së Shkallës së Parë Fier në bazë të fakteve dhe provave të administruara në interes të hetimeve të procedimit penal të regjistruar për vrasjen e shtetasit A. T., ka lëshuar urdhrin për ndalimin e shtetasit F. H., si autor i dyshuar për kryerjen e veprës penale “Vrasje me paramendim” dhe “Mbajtje pa leje të armëve dhe municionit luftarak”, thuhet në njoftimin e Policisë.

Ahmet Toska, 50-vjeç, u vra me armë zjarri në lagjen “Sheq i Madh” në Fier. Ai ishte duke ecur në këmbë teksa u qëllua me armë nga një person, i cili ishte gjithashtu duke ecur në këmbë.

Lexoni gjithashtu: 

Vritet me armë 50-vjeçari në Fier