El Nino po rikthehet, paralajmërohen temperatura ekstreme dhe mot i paqëndrueshëm në botë

Fenomeni klimatik El Nino është rikthyer dhe sipas organizatave ndërkombëtare të meteorologjisë pritet të ndikojë ndjeshëm në kushtet e motit në mbarë botën gjatë muajve të ardhshëm.

Ekspertët paralajmërojnë se ai mund të sjellë temperatura më të larta se mesatarja, reshje intensive, përmbytje, thatësira dhe ngjarje të tjera ekstreme të motit.

El Nino ndodh kur ujërat sipërfaqësore në pjesën qendrore dhe lindore të Oqeanit Paqësor ngrohen më shumë se zakonisht. Kjo ndryshon qarkullimin atmosferik dhe modelet e reshjeve, duke ndikuar në klimën e shumë rajoneve të botës, shpesh mijëra kilometra larg vendit ku krijohet fenomeni.

Sipas Organizatës Botërore Meteorologjike, ekziston një probabilitet prej 80% që kushtet e El Nino-s të zhvillohen plotësisht gjatë periudhës qershor-gusht 2026 dhe mbi 90% që ato të vazhdojnë deri në fund të vitit.

Shumica e modeleve klimatike sugjerojnë se fenomeni mund të jetë të paktën me intensitet mesatar, madje edhe i fortë. Meteorologët paralajmërojnë se El Niño mund të përforcojë efektet e ngrohjes globale, duke rritur rrezikun për valë të të nxehtit, zjarre pyjore, stuhi të forta dhe reshje ekstreme.

Organizata Botërore Meteorologjike ka parashikuar temperatura mbi mesataren pothuajse në të gjithë globin gjatë muajve të verës. Ndikimet e fenomenit ndryshojnë nga një rajon në tjetrin. Disa vende mund të përfitojnë nga reshje më të shumta pas periudhave të gjata thatësire, ndërsa të tjera mund të përballen me mungesë uji, dëme në bujqësi dhe përmbytje të rënda.

Sekretari i Përgjithshëm i OKB-së, Antonio Guterres, e ka cilësuar rikthimin e El Nino-s si një paralajmërim serioz për klimën globale, duke theksuar se fenomeni do të shtojë efektet e një bote që po përballet me temperatura gjithnjë e më të larta dhe ngjarje klimatike gjithnjë e më ekstreme.