Epoka e Hekurit në Angli, zbulohen artefaktet e rralla keltike

Një koleksion i jashtëzakonshëm artefaktesh të Epokës së Hekurit është zbuluar në Norfolk-un Perëndimor, duke hedhur dritë të re mbi kulturën e lashtë britanike.

Thesari, i zbuluar gjatë një gërmimi arkeologjik rutinë nga Pre-Construct Archaeology, përfshin një trombë beteje pothuajse të plotë të Epokës së Hekurit, të njohur si karniks, si edhe pjesë të një tjetre.

Këto objekte prej bronzi me kokë kafshe përdoreshin nga fiset kelte në të gjithë Evropën për të frymëzuar luftëtarët në betejë dhe magjepsnin romakët, të cilët shpesh i përshkruanin ato si trofe lufte. Thesari përfshin gjithashtu një kokë derri të bërë me fletë bronzi, fillimisht pjesë e një standardi ushtarak, pesë mburoja dhe një objekt hekuri me origjinë të panjohur.

Pas zbulimit, objektet u ngritën me kujdes brenda një blloku dheu nga vendi dhe u krye skanimi fillestar për të zbuluar pozicionin e tyre. Ekspertët e konservimit në Shërbimin e Muzeve të Norfolkut hoqën më pas secilin objekt për ekzaminim paraprak.

“Kjo gjetje është një kujtesë e fuqishme e së kaluarës së Epokës së Hekurit të Norfolkut, e cila ende ruan aftësinë për të magjepsur publikun britanik. Ky zbulim do t’u ofrojë arkeologëve një mundësi për të hetuar një numër objektesh të rralla dhe për të zbuluar historinë e tyre”, tha Kuratori i Lartë i Arkeologjisë për Shërbimin e Muzeve.

Anglia po punon me Pre-Construct Archaeology, Shërbimin e Muzeve të Norfolkut dhe Muzeun Kombëtar të Skocisë për të koordinuar kërkimin dhe ruajtjen.

Ende nuk është përcaktuar se ku do të vendosen objektet për qëndrim afatgjatë.