Erdogan: Suedia dhe Finlanda duhet të ekstradojnë 130 terroristë në Ankara

Presidenti turk, Rexhep Tajip Erdogan deklaroi se Suedia dhe Finlanda duhet të deportojnë ose ekstradojnë 130 terroristë në Ankara përpara se parlamenti turk të ratifikojë anëtarësimin e tyre në NATO.

Politikanët finlandezë e interpretuan kërkesën e Erdoganit si një përgjigje ndaj një incidenti në Stokholm javën e kaluar, kur një kukull me imazhin e presidentit turk u var nga këmbët gjatë një proteste, shkruan Euronews Serbia.

“Ky duhej të ishte një reagim, besoj, ndaj ngjarjeve të ditëve të fundit,” i tha ministri i Jashtëm finlandez, Pekka Havisto.

Ndërsa, kryeministri suedez, Ulf Kristersson deklaroi se vendi i tij është në një “pozitë të mirë” për të siguruar që Turqia të ratifikojë ofertën e Stokholmit në NATO.

Turqia ka thënë se Suedia në veçanti duhet së pari të ekstradojë militantët kurdë dhe grupet që Ankaraja i akuzon për një përpjekje për grusht shteti të vitit 2016.