Fati i Christian Eriksen, futbollisti danez në gjendje të qëndrueshme pas atakut kardiak

Fansa të shumtë e kaluan natën jashtë spitalit në Kopenhagen ku po mjekohet futbollisti Christian Eriksen, në mbështetje të tij. Lojtari i kombëtares së Danimarkës thuhet se është jashtë rrezikut për jetën, falë ndërhyrjes së shpejtë, me masazhe kardiake dhe defibrilator.

“Dua të di se si është ai? Bashkëshortja e tij, fëmijët e tij, sepse ai ka familje dhe sot futbolli s’ka rëndësi. Ishte një moment i frikshëm për të gjithë kombin, për të gjithë Evropën të shihje Eriksen në tokë nga një atak në zemër”, thotw Lars Bech, tifoz i Danimarkës.

Eriksen, që luan për ekipin e Interit, u shoqërua jashtë fushe me ovacione nga të dyja palët e tifozerive, me atë finlandeze që bërtiste emrin e tij “Christian” dhe atë daneze që përgjigjej me “Eriksen”.

“Jam shumë i prekur nga ajo që ndodhi. Jam përfshirë në situata të ngjashme si trajner ku kemi rrezikuar të humbasim dikë në fushën e lojës. E di se ç’do të thotë dhe e kuptoj pse të gjithë vrapojnë tek familjet e tyre dhe qëndrojnë me ta. E tillë është edhe kjo situatë. Kemi një natë të gjatë përpara dhe të gjitha mendimet dhe lutjet tona janë për Christian-in dhe familjen e tij”, shprehet Kasper Hjulmand, trajner i Danimarkës.

Nga të dhënat e fundit, të publikuara në mediat lokale, rezulton se aktualisht Eriksen është në gjendje të qëndrueshme dhe ka folur në telefon me shokët e skuadrës.