Fëmijët autikë, Afërdita Seiti tregon se një pjesë e mirë e specialistëve janë të patrajnuar

Sot është dita botërore e autizmit dhe në këtë ditë synohet të rritet ndërgjegjësimi në të gjitha nivelet e shoqërisë lidhur me çrregullimet e spektrit të autizmit dhe përmirësimin e jetës së atyre që jetojnë me autizëm.

Afërdita Seiti, drejtore ekzekutive, shoqata “Ndihmoni Jetën” u shpreh në Euronews Albania se fëmijët me probleme të autizimit sa po vijnë dhe po shtohen.

Ajo tregoi edhe problemet me të cilat përballen familjarët e këtyre fëmijëve.

“Është e vërtetë që ka specialistë dhe janë sensibilizuar, por nuk janë të mjaftueshëm për të punuar sepse edhe mënyrat që ata kanë filluar të punojnë, nuk janë të duhurat”, u shpreh zonja Seiti.

Sipas saj një pjesë e mirë e specialistëve janë të patrajnuar dhe nuk zbatojnë standardet e shërbimit.

Ajo shton se një tjetër problematikë është se shërbimet ndaj fëmijëve autikë nuk monitorohen nga shteti.

“Këto lloj shërbime nuk monitorohen nga shteti. E dyta është se këto shërbime i paguan familja. Vetëm 1900 fëmijë marrin shërbime në qendrat shëndetësore të vendit.  Gjithsej janë 15600 fëmijë me probleme te aftësisë së kufizuar dhe kuptohet mbi 60% janë me probleme të autizimit”, përfundoi ajo.