Fëmijët në Qesarakë bëhen bashkë çdo fundjavë për të pastruar lagjen

Për fëmijët dhe adoleshentët në Qesarakë, në periferi të Tiranës çdo fundjavë nis me pastrimin e hapësirave përpara dhe përreth pallatit të tyre.

Ata mblidhen në mëngjes për të ndarë detyrat sepse për secilin prej tyre është e rëndësishme të kenë një ambient të pastër dhe për këtë japin kontributin e tyre.

“Ne e bëjmë këtë çdo fundjavë, mblidhemi diku te 7-8 veta. Banorët faktikisht na kanë thënë shumë herë që ta marrim këtë iniciativë. Ne kemi rreth një vit që e bëjmë dhe do vazhdojmë ta bëjmë çdo fundjavë,” – u shpreh Ergi.

“Edhe unë me shoqet e mia dhe shokët, çdo fundjavë e pastrojmë oborrin para pallatit që të jetë sa më i pastër,” – tha Kaltrina.

Ndërsa fëmijët kujdesen të mos lënë asnjë cep të lagjes pa pastruar, banorët e pallatit ndihen krenarë për ta. Një grua tregoi për Euronews Albania se dikur çdo lagje ishte e pastër pa pasur nevojë për fushata sensibilizimi.

“Në kohën tonë, pastrimin e bënim të gjithë individualisht. Çdo njeri pastronte pjesën e vet dhe s’kishte nevojë të mblidheshin fëmijët për të pastruar ambientin,” – tha ajo.

Oborri që fëmijët pastrojnë rregullisht është ambienti i vetëm në lagjen e tyre ku mund të luajnë. Kontribuesit e vegjël në pastrimin e mjedisit kërkojnë më shumë hapësira të gjelbra për ta dhe më shumë mundësi për aktivitet fizik.

LEXONI GJITHASHTU: 

• Eksperti i mjedisit Rodion Gjoka: Problemi i mbetjeve ka interesa të pastra ekonomike
• Agjencia Evropiane e Mjedisit: 76.5% e plazheve në Shqipëri me ujë të shkëlqyer, 5 janë të ndotura
• Uji në shishe shumë herë më i keq për mjedisin se uji i rubinetit, thotë studimi