Dvorani në Korçë është një nga fshatrat me prodhimin më të lartë të mollës në juglindje.
Puna e gjithë vitit finalizohet në vjeshtë, ku fruti magazinohet dhe shitet.
Euronews Albania ka kryer një vëzhgim, ku foli nga afër me fermerët, të cilët treguan vështirësitë që ata ndodhen. Sipas tyre, mungesa e tregut ka bërë që pjesa me e madhe e prodhimit të ngelet pa shitur.
“Mbi 250-300 kunjtal. Deri tani kam shitur shumë pak. Nuk ka treg. Ku ti çojmë? Këtu duhet të ketë magazine qendrore, qeveria të më japë urdhër ta mbledh, të seleksionohet, ta gjejë treg. Unë ilaçet i marr shtrenjtë trefishin, plehu ç’të të them. Kur shteti nuk gjen treg, ku do gjej unë si fshatar? Ne pune qeverisë nuk i kërkojmë, ne i kërkojmë vetëm treg”
“Këtë vit unë kam prodhuar 450-500 kuintalë mollë. Nuk kam shitur asnjë kokërr, i kam lënë të gjitha në pemë. Sepse rregullator në këtë mes duhet të jetë shteti. Ku ti shpie unë? Sekonda 27 kujt t’ia japim, ku ti çojmë? Nuk shkon as 15 lek, hiç fare. I hedhim në kanale, në lumë. Nuk ja ka vlejtur barra qiranë”
“Sivjet kemi rreth 200 kuintal mollë. Çmimi është me 20 lek kilogrami, kostoja shumë e lartë. Frigoriferët janë mbyllur, s’marrin fare për shkak të energjisë. Deri tani kam shitur rreth 10 kuinalë molle.”- shprehen banorët.
I riu nga Dvorani, i cili është rikthyer nga emigracioni për të investuar në vendin e vet tregon se në qoftë se mollët nuk shiten, ai do të rikthehet përsëri në Greqi, për të punuar si emigrant.
“Nëse nuk e shes mollën edhe sivjet, është viti i fundit e do iki fare, do iki Greqi. Kam punuar 15 vite Greqi, erdha bëra shtëpi, do e le shtëpinë e të gjitha e do iki prapë në Greqi, ose France për azil. Ne në fshat na shkatërruan fare.”- tha ai.
Euronews Albania kontaktoi me disa prej drejtuesve të drejtorisë së bujqësisë këtu në Korçë të cilët u shprehën se tregu është vet rregullator e se shteti nuk ka kompetencë për të ndërhyrë në të. Një arsye tjetër pse mollët e fushës së Korçës ngelen pa shitur është cilësia e dobët e tyre në krahasim me mollët e vendeve të rajonit
Qarku i Korçës prodhon rreth 120.000 ton mollë në vit, sasi kjo e cila shitet në tregun vendas e më pak në vendet e rajonit.
LEXONI GJITHASHTU:
- Shpërdorim detyre e korrupsion, arrestohen 4 punonjësit e doganës në Korçë
- VIDEO| Momenti kur një person i vë flakën fugonit në Korçë
