Festat e fundvitit, mbi 9 mijë shqiptarë të Kosovës zbresin në Aeroportin “Adem Jashari”

Pavarësisht kushteve jo të favorshme për shkak të pandemisë së Covid-19, shqiptarët që jetojnë jashtë kanë menduar të kthehen pranë të afërmve.

Vetëm gjatë ditës së sotme përmes Aeroportit të Prishtinës kanë arritur në Kosovë mbi 9 mijë shqiptarë, ndërsa janë realizuar mbi 35 fluturime komerciale.

Lajmin e bëri të ditur ministri i Infrastrukturës, Arban Abrashi përmes një statusi në “Facebook”.

Po ashtu ai ka bërë të ditur se ka kërkuar nga autoritetet që të rrisin përpjekjet, që fluksi i personave që presin udhëtarët jashtë terminalit të menaxhohet më mirë.

“Vetëm përmes Aeroportit të Prishtinës sot arritën mbi 9 mijë bashkatdhetarë, dhe u realizuan mbi 35 fluturime komerciale. Ardhja e bashkatdhetarëve për fundvit është lajm i mirë si për ekonominë ashtu edhe për familjet kosovare që bashkohen në këto ditë festash. Situata në Aeroport raportohet të jetë nën kontroll sa i përket zbatimit të masave anticovid brenda terminalit, megjithatë kam kërkuar nga Autoritetet që të rrisin përpjekjet që turma e personave që presin udhëtarët jashtë terminalit të menaxhohet më mirë”, shkruan ai. 

Më herët, ishte kryetari i Aleancës për Ardhmërinë e Kosovës, Ramush Haradinaj i cili i kërkoi qeverisë së Kosovës të heqë ndalesat e qarkullimit deri pas festave, dhe t’u japë mundësi të kthyerve në atdhe të udhëtojnë lirisht.

 “Festat e fundvitit e gjallërojnë jetën në Kosovë, familjet tona dhe po ashtu ekonominë e vendit. Zakonshëm po ndodh edhe këtë vit, pavarësisht rrethanave pandemike, sikurse edhe në rrethanat e vështira historike për shqiptarët, mijëra bashkatdhetarë ia kanë mësyrë Kosovës”, ka shkruar Haradinaj.