FIA dhe Mercedes dënojnë si “të papranueshme” fyerjet raciste ndaj Hamiltonit në rrjetet sociale

Shtatë herë kampioni i botës në Formulën 1, Lewis Hamilton, vuajti fyerje raciste në rrjetet sociale pasi të dielën fitoi në mënyrë të diskutueshme Çmimin e Madh të Britanisë.

Hamilton mori 10 sekonda penallti pasi u përplas me kundërshtarin Max Verstappen gjatë xhiros së parë të garës. Përplasja detyroi holandezin e Red Bull që të tërhiqej.

Fyerjet ndaj Hamiltonit u vunë në dukje nga shtypi britanik mëngjesin e së hënës. Mercedesi dhe drejtuesit e Federatës Ndërkombëtare të Automobilizmit (FIA) i dënuan ato si të papranueshme.

“Këta njerëz nuk meritojnë të kenë hapësira në sport,” – thanë në një deklaratë të përbashkët Mercedesi dhe FIA teksa u kërkua që të merreshin masa kundër abuzuesve.

Verstappen u dërgua të dielën në spital si masë paraprake për përplasjen që pësoi. Pas kontrolleve të imtësishme, mjekët konfirmuan se ai nuk pësoi lëndime serioze.

Penalltia prej 10 sekondash ndaj Hamiltonit e ktheu atë në vendin e katërt, por ai ia doli të tejkalonte përpara. Britaniku parakaloi Charles Leclerc dy xhiro përpara fundit duke marrë dhe vendin e parë.

Verstappen vijon të kryesojë kampionatin me 185 pikë, por pas fitores së të dielës, Hamilton ka ngushtuar diferencën në vetëm 8 pikë.

Por kjo fitore duhet thënë se nuk kaloi pa komente. Verstappen e konsideroi “jo-sportive” dhe “pa respekt” festën e Hamiltonit teksa ai ishte në spital. Komentet e Verstappen erdhën pak përpara se piloti britanik të postonte në Twitter:

“E sotmja na kujtoi rreziqet e këtij sporti. Dërgoj urimet e mia më të përzemërta për Maksin, i cili është një kundërshtar i jashtëzakonshëm. Jam i lumtur që ai është mirë. Gjithmonë do të garoj fort, por në mënyrë të ndershme. Skuadra jonë tregoi përqendrim dhe këmbëngulje. Ëndërr për mua të fitoj në shtëpi.”

Today is a reminder of the dangers in this sport. I send my best wishes to Max who is an incredible competitor. I’m glad to hear he is ok. I will always race hard but always fairly. My team showed grit and perseverance out there. It’s a dream to win in front of my home crowd💜🇬🇧 pic.twitter.com/3S16uFYmDZ

— Lewis Hamilton (@LewisHamilton) July 18, 2021

Fyerjet ndaj Hamiltonit vijnë pak javë pasi futbollistët me ngjyrë të përfaqësueses angleze, Marcus Rashford, Jadon Sancho dhe Bukayo Saka u shënjestruan si fajtorë të humbjes së evropianit ndaj Italisë.

LEXONI GJITHASHTU:

• Hamilton arrin fitore dramatike në “Silverstone”
• Futbollisti anglez Marcus Rashford reagon pas fyerjeve raciste në rrjetet sociale
• Kryeministri Boris Johnson i cilëson “të tmerrshme” fyerjet raciste ndaj futbollistëve me ngjyrë të Anglisë