FIFA pranon kërkesat e Partizanit, Eraldo Çinarit i lejohet të luajë me të kuqtë

Federata Ndërkombëtare e Futbollit (FIFA) ka pranuar kërkesat e klubit të Partizanit për të lejuar aktivizimin e futbollistit Eraldo Çinari.

Lajmi u bë me dije nga klubi kryeqytetas, që theksoi se “vendimi ka efekt të menjëhershëm”.

Çinari, 24 vjeç, ishte pezulluar për katër muaj pas pretendimeve për parregullsi që pati transferimi i tij nga klubi kroat i Istras. Për çështjen në fjalë fillimisht FIFA e gjobiti futbollistin me 83 mijë euro, ndërsa pezulloi fushatën e transferimeve të lojtarëve të Partizanit.

Klubi 16-të herë kampion i Shqipërisë mundi ta rrëzojë poshtë në Gjykatën e Arbitrazhit Sportiv vendimin e pezullimit të merkatos dhe që prej fillimit të janarit ka nisur edhe lëvizjet e lojtarëve.

Tashmë Çinari do të jetë një vlerë e shtuar për trajnerin Ilir Daja, i cili synon të shkurtojë diferencat me Vllazninë kryesuese të këtij sezoni. Të kuqtë janë 9 pikë pas klubit shkodran dhe janë të dytët në tabelën e renditjes me pikë të barabarta me Teutën.

Të mërkurën Partizani përballet me Tiranën në një derbi që mund ta shohë Çinarin, së paku të grumbulluar.

Lexoni gjithashtu:

Arbitrazhi rrëzon pezullimin e FIFA-s, Partizanit i lejohet merkatoja e janarit

Tjetër gjobë nga FIFA, Partizani dhe Erald Çinari duhet të paguajnë 83 mijë euro