Filmi i regjisorit nga Kosova, triumfon në Sarajevë

“Zemra e Sarajevës” i takon Visar Morinës. Regjisori shqiptar nga Kosova që jeton në Gjermani, është rikthyer pas një pauze 5-vjeccare me filmin “Exile” për të triunfuar në një nga festivalet më presigjoze europiane të filmit. “Exile” ndjek ankthin dhe paranojën e një inxhinieri farmaceutik me orgjinë nga Kosova, që ndihet i paragjykuar dhe i diskriminuar nga kolegët e punës prej origjinës së tij.

“Filmi ka në qendër një burrë 45-vjeccar që ka një pozitë të mirë punë, në një firmë që prodhon ilaçe. Një moment të caktuar; i nxitur nga disa veprime: pret për një konferencë ku nuk vjen kurrkush, nuk e informojnë për ndryshimin e sallës, kur shkon në shtëpi gjen një mi të ngordhur, ai fillon të krijojë një ndjesi që kolegët e tij të punës nuk e pranojnë mes tyre dhe duan ta largojnë. Ai nuk gjen arsye tjetër për këto ngacmime përveç faktit që është me orgjinë kosovare”- sqaron regjisori Morina.

Gjeste fillimisht të vogla kthehen gradualisht në një dyshim gjithëpërfshirës që e konsumon dita-ditës duke u transformuar në një ankth të përhershëm që reflektohet në gjithë marrëdhëniet e tij.

Filmi “Exile” ndërmerr një udhëtim të errët në mendjen e një njeriu që ndjen se po trajtohet padrejtësisht nga bota që e rrethon. Dilema që përshkon gjithë filmin vërtitet mes pasigurisë nëse bëhet fjalë për një rast racizmi të vërtetë apo thjesht një paranojë së personazhit.

“Filmi luan me psikologjinë e personazheve, pasi në çdo moment ngelet në pikëpyetje nëse është ose jo realisht ndjesia e racizmit e pranishme.’Exile’ rrotullohet rreth një personi që nuk është i sigurtë për vendin e vet brenda një shoqërie. Te Xhaferi gjejmë si momente heroike, si momente joheroike, në thelb doja të ishte një njeri si të gjithë ne.”- shprehet regjisori. 

“Exile” është një portret i brishtë, i butë por dhe i errët se si dyshimi mund të konsumojë një njeri dhe të ndikojë në mënyrë të paevitueshme edhe pjesën tjetër të njerëzve që e shoqërojnë atë. Xhaferi, në sytë e Morinës është çdo banor i një vendi që emigron në një shtet tjetër dhe vuan nga një krize e vazhdueshme identiteti.