Finalja Itali-Angli, historia favorizon ekipin e ‘Azurrëve’

Italia dhe Anglia do të përballen për të 28 herë në mbrëmjen e 11 korrikut, por për të parën herë në finalen e një kampionati evropian.

Italia ka 53 vite që nuk ka mundur të ketë sukses në këtë kompeticion, ndërsa Anglia ende nuk e ka shijuar titullin e parë, ndërsa ka 55 vite që nga trofeu i fundit, që është Kupa e Botës.

Ndeshja e parë mes këtyre dy skuadrave daton në 13 maj të viti 1933 e cila përfundoi në barazim 1-1, ndërsa deri në 1976 ndeshjet mes këtyre dy përfaqësueseve kanë qenë miqësore.

Italia ka një bilanc pozitiv sa i takon takimeve me skuadrën e “Tre Luanëve” pasi ka mundur që të rrëmbejë 10 fitore, kundrejt 8 sukseseve të britanikëve, ndërsa 9 takime janë ndarë në barazim, nga të cilat tre me rrjeta të paprekura.

Anglezët kanë shënuar më shumë gola, 33 ndërsa “Azurrët” 2 më pak.

Anglia si pritëse ka mundur që të dalë me fitore në 5 ndeshje, ndërsa Italia ka arritur 7 herë sukses si udhëtuese përballë Anglisë, një statistikë që mund ti motivojë edhe në finalen, e cila do të luhet në Wembley.

Dy ndeshjet e fundit mes Anglisë dhe Italisë janë regjistruar në vitet 2015 dhe 2018 e të dyja këto përballje kanë përfunduar në barazim 1-1.