”Finalja” Real-Inter, të dyja skuadrat në moment të vështirë, fitorja opsioni i vetëm

Real Madrid pritet të ketë një ndeshje mjaft të vështirë përballë Interit në Ligën e Kampioneve.

Madrilenët 13 herë fitues të këtij kompeticioni nuk kanë bërë një nisje të mirë sezonit pasi në dy ndeshjet e para kanë arritur një barazim dhe një humbje.

Takimi përballë zikaltërve është cilësuar si një finale nga trajneri i Los Blancos Zinedine Zidane pasi një tjetër rezultat negativ do komplikonte ndjeshëm shanset për kualifikim në fazën tjetër.

Për madrilenët mungon Eder Militao i prekur me Covid, por Zidane nuk kërkon të gjejë alibi, sipas tij futbollistët duhet të tregojnë se meritojnë fanellën që mbajnë veshur.

Kjo është një ndeshje vendimtare edhe për interin që gjithashtu nuk i ka bërë një nisje të mirë fazës së grupeve në Champions, pasi në dy ndeshjet e para ka vetëm dy barazime.

Ndërkohë që edhe në kampin Zikaltër ka mungesa. Antonio Conte nuk do ketë në dispozicion Romelo Lukakun për shkak dëmtimi dhe pesha e sulmit pritet ti kalojë Lautaro Martinez që deri tani nuk ka arritur të tregojë një formë të mirë.

Ndeshja e fundit në champions mes këtyre dy skuadrave daton në nëntorin e vitit 1998. Në atë kohë ishin Los Blancos që triumfonin në shifrat 3-1

Në takimet e tjera të mbrëmjes Atalanta pret në shtëpi gjigantët e Liverpool ndërkohë që kampionët e Bayern udhëtojnë në transfertën e Salzburg.