Fisnik Asllani në radarët e Bayern dhe Barcelonës, Hoffenheim kërkon 50 milionë euro

Fisnik Asllani nuk do të largohet për më pak se 50 milionë euro, ky është vendimi i marrë nga Hoffenheim, skuadra e Bundesligës gjermane ku aktivizohet 23-vjeçari.

Asllani është një ndër lojtarët më në zë shqiptar dhe po shkëlqen me ekipin e tij, duke tërhequr vëmendjen e disa gjigantëve të futbollit evropian.

Sulmuesi aktivizohet rregullisht me Hoffenheim, ku është kthyer në një lider dhe një lojtar shumë të vlerësuar nga drejtuesit.

Sipas mediave gjermane, Hoffenheim ka vendosur një çmim të lartë për shtatlartin, duke deklaruar se çdo skuadër që dëshiron ta afrojë duhet të paguajë të paktën 50 milionë euro.

Edhe pse një shumë e lartë, potenciali i Asllanit është jashtëzakonisht i madh, aq sa ka tërhequr interesin e Bayern Munchen dhe Barcelonës.

Të dyja klubet, nëse duan ta bëjnë të tyre futbollistin, duhet të derdhin 50 milionë euro në arkat e Hoffenheim.

Që prej nisjes së këtij sezoni, Asllani ka munguar vetëm në 5 ndeshje, duke luajtur në të gjitha të tjerat, kryesisht si titullar.