Fitorja e Joe Biden, analisti Ismet Ramadani: Do të ndihmojë Maqedoninë e Veriut për t’u bërë pjesë e BE

Analisti politik, Ismet Ramadani u shpreh për “Goodmorning Albania”  se beson se administrata e Joe Biden do të ndihmojë Maqedoninë e Veriut për t’u bërë pjesë e Bashkimit Europian.

 “Administrata amerikane ka qenë dhe është prezent në rajon edhe në Maqedoninë e Veriut. Dallimi është se Joe Biden është një njohës i mirë i rajonit dhe ai disa herë ka udhëtuar nëpër këto kryeqendra të shteteve të Ballkanit.  Ai është një njohës i mirë i zhvillimeve politike dhe njohës i mirë i konflikteve, si ajo e Kosovës me Serbinë dhe këtu në Maqedoninë e Veriut në vitin 2001.

Ai ka përcjellë situatën dhe në Maqedoninë e Veriut dhe kur është kështu mund të presim që njohja e zhvillimeve mund të jetë shumë produktive për të ndihmuar edhe Maqedoninë Veriut. Ne dimë që Maqedonia është anëtare e NATO-s dhe kjo e bën edhe aleate më të fortë me SHBA.

Duhet të jemi mirënjohës edhe për administratën Trump. Duhet të themi që Trump ishte i parashikueshëm, sidomos në raportet me Bashikim Europian. Tani pritet një bashkëpunim midis administratës Biden dhe BE-së. Maqedonia e Veriut është në ecje për të vijuar negociatat me BE-në. Kemi një problem me Bullgarinë, për një fakt se ka çështje problamatike, identiteti i gjuhës, historisë.

Presim që administrate Biden nëpërmjet ndikimit të NATO-s mund të sjellë ndonjë rezultat pak më të mirë. Mund të sjellë dhe anëtarësim e Maqedoninë Veriut  në BE”, u shpreh ai.

Ramadani theksoi më tej se  pritet që Joe Biden të përkrahë Kosovën, sa i përket çështjeve të pazgjidhura me Serbinë.

“Shumë reale, pritet që Biden të përkrahë Kosovën, pa marrë parasysh që një marrëveshje u nënshkrua në Shtëpinë  e Bardhë nga Presidenti Trump. Interesimi për Kosovën do të vazhdojë.”, tha ai.