Fjalimi i parë i Vjosa Osmanit si presidente: Serbia të kërkojë falje për krimet

Me 71 vota pro në raundin e tretë, Vjosa Osmani u zgjodh presidente e Kosovës. E paduruar për të mbajtur fjalimin e parë si kryetare e shtetit, Vjosa Osmanit iu desh të presë disa minuta.

Këto momente i shfrytëzoi për t’u përshëndetur me bashkëpunëtorët e ngushtë të saj.

Fjalimin e nisi duke kthyer në vëmendje të shkuarën e Kosovës, luftën e saj për liri.

Por, për të mos harruar sakrificën e atyre që dhanë jetën dhe të atyre që ende rezultojnë të zhdukur, presidentja tha se Kosova do të kërkojë drejtësi dhe se në dialogun me Serbinë do të jetë e barabartë.

“Dialog i drejtë dhe i barabartë paqe kur Serbia të pendohet të kërkojë falje e të vihet drejtësi”, u shpreh znj. Osmani.

Uniteti ishte lajtmotivi që shoqëroi fjalimin e parë të presidentes.

“S’jemi shumë për t’u ndarë në ‘ne’ dhe ‘ata’, jemi një! Dera ime e hapur, s’ka parti të opozitës e pozitës”, u shpreh ajo.

Një falënderim të veçantë e kishte për ish-partinë e saj, Lidhjen Demokratike të Kosovës.

Ndërsa debateve për votat nga partitë e tjera në favor të saj u dha këtë përgjigje:

“Te sfidosh veprimet e gabuara, të qëndrosh pas bindjeve tua …nuk është thjesht çështje vote, përmbushja më e madhe, në realizimin e misionit… “veprime të tilla guximtare, janë dëshmi e madhështisë së secilit nga ju”, u shpreh znj. Osmani.

Si gruaja e dyte presidente në Kosove dhe në Ballkan, ajo përcolli edhe një mesazh për gratë dhe vajzat.

Fjalimin e parë si presidente e mbylli me fjalët e Jusuf Gërvallës, “Rruga e drejtë është më e zorshmja!”