Ekonomi | Lajmi i fundit

FMN: Rritja e pagave godet inflacionin, duhet të pajtohet me rritjen ekonomike

22 Qershor 2023 | 16:52

Fondi Monetar Ndërkombëtar (FMN) ka njoftuar në deklaratën e fundit për Shqipërinë se inflacioni mund të zgjasë më shumë se sa pritej. Kjo vjen si pasojë e rritjes së pagave në sektorin publik si dhe kushteve të vështira të tregut të punës.

FMN theksoi se rritja e buxhetit për pagat në sektorin publik duhet të shoqërohet me masa për të rritur efikasitetin në të ardhurat dhe përfitimet.

Në vizitën e tyre në Shqipëri, ekipi i FMN-së, në krye me Znj. Anke Weber, diskutoi zhvillimet makroekonomike të fundit, parashikimin si dhe politikat prioritare.

Znj. Weber deklaroi se: “Ekonomia shqiptare ka kaluar pritshmëritë në vitin 2022, duke rritur me 4.8%. Kjo u arrit falë kërkesës së fortë të konsumatorëve, turizmit si dhe aktivitetit të ndërtimit.”

“Parashikimi kushtëzohet nga një pasiguri e madhe. Rritja ekonomike e partnerëve tregtarë më e ngadaltë se pritshmëritë mund të ndikojë eksportet dhe rritjen ekonomike në Shqipëri. Inflacioni mund të zgjatë më shumë, i nxitur nga kushtet e shtrënguara të tregut të punës dhe nga rritjet e konsiderueshme të pagave në sektorin publik, duke ndikuar edhe në pagat e sektorit privat. Një përshkallëzim i luftës së Rusisë në Ukrainë dhe moti i pafavorshëm, si faktor në prodhimin e energjisë elektrike, mund të sjellin një përsëritje të goditjeve të ofertës. Nga ana tjetër, ekonomia mund të jetë përsëri më e qëndrueshme se pritshmëritë, falë ecurisë së fortë në turizëm”, thekson FMN.

Pritet që rritja ekonomike për vitin e ardhshëm të jetë e moderuar, rreth vlerës 3%. Inflacioni është ulur gradualisht, por ende mbetet objektiv për politikat monetare të të shtrënguara të Bankës Qendrore.

FMN mbështet përpjekjet e Bankës së Shqipërisë për të fuqizuar gradualisht rezerva më të mëdha kapitali bankar si dhe nxit monitorimin e vazhdueshëm të riskut të kredive bankare, kursit të këmbimit si dhe normave të interesit.

LEXONI GJITHASHTU: