Formula 1, Lewis Hamilton fiton garën e Portugalisë

Lewis Hamilton ia doli të fitojë garën e dytë për këtë sezon duke lënë sërish pas Max Verstappenin e Red Bull Racing.

Në Çmimin e Madh të Portugalisë, kampioni i botës festoi fitoren e 97-të në karrierë duke iu afruar edhe më tej synimit prej 100 fitoreve në Formulën 1.

Përballja e kësaj fundjave ishte më e fortë se ajo e viteve të fundit ku Hamilton hasi konkurrencë jo vetëm nga dyshja e Red Bull Verstappen dhe Perez, por edhe nga shoku i tij i skuadrës Valtteri Bottas. Ky i fundit pati siguruar “Pole-Position” me një kohë 7 të mijtat e sekondit më të shpejtë se Hamilton.

Nisja e garës pa Hamiltonin të zbriste fillimisht në vendin e tretë e më pas, pas 20 xhirosh, të merrte vendin e parë për të mos e humbur më. Pasi mori kryesimin britaniku bëri që fitorja në Portimao të dukej tejet e lehtë, por në fakt nuk ishte dhe aq.

Drejtuesi i skuadrës Mercedes tha pas garës se suksesi ishte meritë vetëm i Hamilton, pasi këtë sezon diferencat me Red Bull-in janë ngushtuar ndjeshëm dhe kjo mund të jetë hera e parë që dominanca e nisur prej vitit 2014 të mund të vihet në diskutim.

Pas tre garash Hamilton kryeson kampionatin me 69 pikë, pas vjen Verstappen me 61, Landro Norris i McLaren me 37 dhe Valtteri Bottas, po me Mercedes, me 32.