Forumi për Ballkanin Perëndimor, liderët thirrje Brukselit të mbajë premtimet ndaj rajonit

Forumi për Ballkanin Perëndimor i organizuar nga “The Economist” ka mbledhur këtë të enjte në Shkup liderët e shteteve të rajonit.

I ftuar në këtë forum, kryeministri i Kosovës Albin Kurti ka folur edhe për aksionin në veri të vendit, ku tha se po luftohet për korrupsionin dhe krimin e organizuar. Për të, Ballkani duhet të përballet edhe me të kaluarën dhe gjenocidet e popujve ballkanik.

“Përballja me të kaluarën është një element që duhet të përballen shtetet ballkanike. Që me të vërtetë të fillohet me paqen, duhet të zgjidhim të kaluarën. Të përballemi me pastrimin e saj, siç janë spastrimet etnike, gjenocidet”, u shpreh Albin Kurti.

Në këtë forum, kryeministri i RMV-së, Zoran Zaev u ndal tek problemet me Bullgarinë dhe veton ndaj Maqedonisë së Veriut që ka bllokuar procesin e anëtarësimit në BE. Zaev theksoi se pas zgjedhjeve në Bullgari mund të zgjidhet ngërçi mes dy vendeve.

“Personalisht besoj se deri në fund të këtij viti është e mundur zgjidhja me Bullgarinë. Ata e kuptojnë atë edhe kur flasim njëri me tjetrin, madje edhe bashkë në konferenca për shtyp ata thonë gjuha maqedonase, njerëzit maqedonas, megjithatë zyrtarisht nuk e pranojnë”, tha Zoran Zaev.

Sa i përket Malit të Zi, zv.kryeministri Dritan Abazoviç ishte kritik ndaj sjelljeve të liderëve politik evropianë karshi vendeve të Ballkanit Perëndimor.

“Kuptohet që kemi probleme mes vendeve të rajonit tonë. Retorika e liderëve të BE-së, ndonjëherë nuk është në harmoni me ato vlera. Nëse vërtetë duam anëtarësim në BE, duhet të veprojmë në harmoni me vlerat evropiane”, tha Dritan Abazoviç.

Pjesëmarrësit në Samit shpresojnë se procesi i zgjerimit të BE-së është akoma i gjallë dhe i bënë thirrje Brukselit që të realizojë premtimet ndaj Ballkanit Perëndimor.

LEXONI GJITHASHTU:

• Aksioni në Veri, Kurti: Po luftojmë korrupsionin dhe krimin e organizuar multietnik