FOTO| Momenti i përplasjes me armë zjarri në Elbasan

Elbasani u trondit ditën e sotme nga një përplasje me armë zjarri ku mbeti i vrarë shtetasi Pjerin Xhuvani dhe u plagosën 4 të tjerë: Emiljan Prenga 39 vjeç; Pavlo Vuksani  50 vjeç; Eltjon Bodinaku  32 vjeç dhe Xhensila Sota  27 vjeçe  (punonjëse e policisë).

Autori i vrasjes, ish-efektivi i RENEA-s, Arbër Papleka është dorëzuar në policinë e Tiranës pak pas ngjarjes së rëndë.

Në foton e mësipërme shihet momenti kur Papleka duket me armë në dorë, pranë një furgoni, që sipas informacioneve paraprake i përkiste Partisë Demokratike, pak momente përpara se të ndodhte shkëmbimi i zjarrit që la të vrarë 56-vjeçarin Xhuvani.

Në deklarimet e para i vetëdorëzuari sipas burimeve, ka thënë se e ka bërë për vetëmbrojtje dhe se ngjarja ka precipituar, pasi sipas tij viktima po shpërndante para për vota.

Pjerin Xhuvani njihej në Elbasan pasi ka qenë drejtor i Spitalit Psikiatrik të Elbasanit e më pas drejtor i Drejtorisë Rajonale të Fondit të Detyrueshëm të Kujdesit Shëndetësor. Në vitin 2015 qe arrestuar për abuzime me skemën e rimbursimit të ilaçeve.

Ai ka qenë i angazhuar me disa parti politike. Më parë ka qenë funksionar i LSI-së në Elbasan, apo dhe Partisë Drejtësi, Integrim dhe Unitet. Gazetari Merin Maçi tha se së fundmi nuk ka pasur të dhëna për angazhim specifik me ndonjë forcë politike.

Në përplasjen mes simpatizantëve të Partisë Socialiste dhe Partisë Demokratike, më 14 mars, Pjerin Xhuvani qe pikasur në fotografi të denoncuara nga opozita teksa përshëndetej me Sekretarin e Partisë Socialiste Taulant Balla.

Lexoni gjithashtu:

Një i vrarë dhe katër të plagosur në Elbasan, pranga autorit të dyshuar

Presidenti Ilir Meta reagon për vrasjen në Elbasan