Franca në flakë, Macron ofertë për paqe. Mesazhi për sindikatat

Presidenti i Francës, Emmanuel Macron bëri thirrje për pajtim kombëtar lidhur me reformën e pensioneve. Fjalimi i tij erdhi teksa në qytete të ndryshme të vendit mbaheshin protesta.

Presidenti u shpreh i vetëdijshëm se reforma nuk kishte gjetur mjaftueshëm mbështetje dhe premtoi se do të punojë për një reformë madhore pune për të zgjidhur tensionet sociale.

“Ky pakt i ri për punën do të ndërtohet në javët dhe muajt e ardhshëm përmes një dialogu social dhe marrëveshjeve konkrete në nivel kombëtar, por edhe me diskutime në terren, me sindikatat dhe organizatat e punëdhënies që do të gjejnë më lehtë bashkëbiseduesit. Vetëm përmes riindustrializimit vendi do të rikuperojë fuqitë e tij dhe do të krijojë vende më të mira pune”, tha Macron.

Sidoqoftë, fjalimi i tij nuk i ka qetësuar sindikatat dhe opozitën, të cilat kanë vijuar protestat duke e cilësuar Macron si një president “të shkëputur nga realiteti” dhe duke premtuar një ditë historike në protestën madhore të 1 majit.

“Lufta vazhdon, 1 maji do të jetë një ditë historike. Ky është një premtim”, ka deklaruar një nga sindikatat.

LEXO GJITHASHTU:

• “Pavarësia e Evropës”| Macron: Nuk mund të përfshihemi në çështjen e Tajvanit
• Franca në flakë për pensionet, protesta në disa qytete: Digjet komisariati