Franca tronditet nga vrasja e berberit tunizian, policia: Krim racist anti-mysliman

Tronditja nga vrasja e një berberi tunizian në një fshat pranë Rivierës Franceze fundjavën e kaluar vazhdon të jehojë në të gjithë Evropën Perëndimore, ndërsa autoritetet e dënojnë krimin si të nxitur nga urrejtja.

46-vjeçari Hichem Miraoui u qëllua për vdekje pranë shtëpisë së tij në Puget-sur-Argens, në Francën jugore, të shtunën.

Një nga fqinjët e tij ka marrë përgjegjësinë për sulmin, në të cilin mbeti i plagosur edhe një burrë me prejardhje turke.

Në video të postuara në Facebook pak para arrestimit, i dyshuari, i identifikuar si Christophe B., 53 vjeç, përdor gjuhë raciste dhe duket se nxit qytetarët francezë të kryejnë akte të mëtejshme dhune kundër myslimanëve.

Ministri i Brendshëm francez, Bruno Retailleau, deklaroi të martën se vrasja ishte “qartësisht një krim racist”, “ndoshta edhe anti-mysliman” dhe “ndoshta edhe një krim terrorist”.

Zyra e Prokurorit Kombëtar Kundër Terrorizmit (PNAT), e krijuar në vitin 2019, ka nisur një hetim për këtë vrasje – hera e parë që kjo zyrë ndërhyn për një vrasje të dyshuar si e frymëzuar nga ideologjia e ekstremit të djathtë.

Që nga vrasja e Miraoui-t, komunitetet myslimane në të gjithë Francën kanë shprehur trishtimin dhe frikën e tyre.

Në një deklaratë të lëshuar të martën, Këshilli i Xhamive të Rhone e cilësoi krimin si tregues të “klimës shqetësuese dhe gjithnjë e më armiqësore ndaj qytetarëve të besimit mysliman në Francë”.

Ndërkohë, Hafiz Chems-Eddine, Rektori i Xhamisë së Madhe të Parisit, bëri thirrje për “ndërgjegjësim urgjent kombëtar për rreziqet e retorikës ksenofobike, raciste dhe islamofobike”.

“Është koha për të vënë në pikëpyetje nxitësit e kësaj urrejtjeje, të cilët, në sferat politike dhe mediatike, veprojnë pa u ndëshkuar dhe çojnë në incidente jashtëzakonisht të rënda”, tha ai.

Udhëheqës islamikë bënë gjithashtu lidhje mes vrasjes së Miraoui-t dhe therjes fatale me thikë të 22-vjeçarit malian Aboubakar Cisse në një xhami në Francën jugore më 25 prill. Edhe në atë rast, në një video të filmuar ndërsa Cisse po vdiste, sulmuesi i tij francez kritikoi Islamin.

LEXONI GJITHASHTU:

• Kishte veshur bluzën me mbishkrimin Palestinë, deputetja nxirret jashtë Bundestagut
• Eksperti i kriminalistikës tregon si u futën dronët në brendësi të territorit rus