Tyson Fury fiton me K.O ndaj Wilder dhe ruan titullin kampion në WBC

Britaniku Tyson Fury konfirmohet kampion bote në peshën e rëndë (kategoria WBC), pas fitores me K.O (Knock Out) në raundin e 11-të ndaj amerikanit Deontay Wilder, sfidë e zhvilluar në Las Vegas, duke fituar kështu edhe trilogjinë. Boksieri britanik korri fitoren e 31-të në karrierë, duke qëndruar i pamposhtur.

Një përballje që nisi e ekuilibruar, por në raundin e tretë është Fury ai që hedh në tapet Wilder. Ky i fundit nuk dorëzohet dhe reagon në raundin e katërt, duke hedhur dy herë në tapet britanikun. Në raundet që pasojnë është britaniku që dominon në ring, por në raundin e dhjetë arrin ta hedhë sërish Wilder në tapet. Ndërsa në të 11-tin, goditjet e forta të Fury e bëjnë të pamundur zhvillimin e duelit nga amerikani. Wider bie sërish në tapet dhe këtë herë gjyqtari ndal sfidën, pasi amerikani nuk vazhdon dot më.

Nga raundi në raund Wilder dukej më i dobët dhe i lodhur, fakt që u shfrytëzua mirë nga Fury, që është një boksier që mbrohet mirë dhe reagon shpejt. Një triumf i merituar i britanikut, që dhuroi spektakël në ring, qëndron i pamposhtur dhe konfirmohet si një nga boksierët më të mirë në histori në peshën e rëndë.