Fushata elektorale, Kodi Zgjedhor filtron materialet me kaseta

Ndryshimet në Kodin Zgjedhor prekën shumë fusha të administrimit të procesit zgjedhor por jo në tërësi marrëdhëniet e partive politike me median.

Në këshillin politik fillimisht u propozuan shumë variante se si do të bëhej fushata e partive nëpër televizione si ndalim të intervistave të kandidatëve në edicionet informative, ndalim për transmetimin e informacioneve të përgatitura nga partitë politike etj. Por asnjë nga këto nuk u miratua, partitë u tërhoqën.

Ndryshimi i vetëm që bënë përfaqësuesit politik ishte tek çështja e trasmetimit të materialeve të përgatitura nga partitë apo siç njihen edhe materialet me kaseta.

Sipas këtij ndryshime, këto material do të transmetohen në televizion vetëm duke vendosur shënimin mbi pamje “material filmik servirur nga subjekti”.

Neni në Kodin Zgjedhor që trajton reklamat politike në media është e shoqëruar edhe me shumë sanksione financiare ndaj operatorit mediatik që shkel rregullat e Kodit. Konkretisht 1.5 milion lekë është gjoba për televizionet lokale dhe 3 milion për televizionet kombëtare nëse nuk respektojnë raportet e partive politike në transmetimin mediatik.

Krahas sanksionit adminsitrativ, ligji zgjedhor parashikon ehe bllokimin e transmetimit të sinjalit për 48 orë në rast se shkelet barapesha e debateve mediatike.

Ndërsa minutazhi i partive politike në zgjedhje është 90 minuta në total për partitë parlamentare për 30 ditë fushatë dhe 10 minuta për partitë jo parlamentare.