Fushata elektorale, Plator Nesturi: S’ka ballafaqim, palët si dy ushtri që s’takohen në betejë

Për analistin Plator Nesturi, partitë politike në këto zgjedhje po i shmangen ballafaqimeve me njëra-tjetrën.

I ftuar në emisionin “Ilva Now” në Euronews Albania, Nesturi e konsideroi “zgjedhje të zgjuar” qasjen e kryetarit të Partisë Demokratike, Lulzim Basha për t’u fokusuar vetëm te programi dhe “retorika e qetë”. Kjo sipas tij i lejon që të ketë kontakte “më të qeta me elektoratin”.

Megjithatë në tërësi, Nesturi tha se është e vështirë të kuptohet “impakti i kësaj qasjeje te elektorati”. Duke analizuar në përgjithësi, Nesturi tha se në këto zgjedhje të dyja palët politike i duken si “ushtri ku secila shkon në luftë, por asnjëra nuk e takon njëra-tjetrën për betejë”.

Nesturi tha se shoqërisë dhe mediave i mungon një grup ekspertësh me besueshmëri te publiku për t’i nxitur ballafaqimin palëve, për t’u kërkuar bilancin e punëve, apo premtimeve dhe se sa të realizueshme janë ato.

Nesturi u ndal më tej të analizonte edhe spotet e fushatave, apo dhe daljet publike. Në veçanti ai tha se tashmë në publik “ka dalë edhe Presidenti Meta”, i cili duke dalë shpesh në debate publike “ka vendosur më shumë në vështirësi Lulzim Bashën”.

Sipas Nesturit sulmet për çështje edhe “jashtë-fushate” avantazhojnë Ramën dhe “këtë gjë ai po e shfrytëzon më së miri”.

LEXONI GJITHASHTU:

• Gazetari Erl Murati zbërthen domethënien e taktikave elektorale të PS dhe PD
• Publikimi i dhënave personale, Adri Nurellari: Vjedhje. Edlira Gjoni: Përbën shkelje flagrante
• Adri Nurellari: Qeveria e instrumentalizoi programin e vaksinimit për fushatë