Pikat e forta dhe të dobëta të Ramës e Bashës sipas Neritan Sejaminit

Drejtuesi i emisionit ‘Me pak fjalë’ në Euronews Albania, Neritan Sejamini tha në studion e ‘Ilva Now’ se strategjia e kryeministrit i mbështetur në rolin e shpëtimtarit në një kohë fatkeqe, duke shfrytëzuar tërmetin dhe pandeminë, ishte një pikë e fortë që u shfrytëzua siç duhet nga kreu i qeverisë ashtu siç sipas tij, do të vepronte cilido politikan tjetër për fushatë.

Por për politologun Adri Nurellari, propaganda e Ramës me vaksinat ka qenë jo vetëm bajate, por edhe e rrezikshme. Sipas tij, numri i vaksinave të ardhura në Shqipëri është trumbetuar, sepse ka dalë kryeministri me 3-4 media duke i pritur e më pas i ka shpërndarë me pikatore duke luajtur me jetën e njerëzve.

“Për të dhënë përshtypje që ka marr pa fund vaksina nxjerrë nga 10 e 20 mijë për show. Kjo ka kosto jete, sepse nëse kanë ardhur vaksinat duhet të administrohen menjëherë, në momentin që ti i jep vaksinat, ti shpëton jetë. Kur vaksinat i shpërndan nga 10 e 20 në ditë si pikatore, vetëm për të dhënë përshtypje që ka vaksina, ne e dimë sa është i gatshëm është sistemi shëndetësor për të administruar vaksinimin. Mund të bënin 30 mijë në ditë dhe të shpëtonin jetë”, reagoi Nurellari.

Sipas Sejaminit, fushata e Ramës, megjithëse bajate ka qenë efikase, pasi ka pasur një mesazh të thjeshtë; vendi ka pasur një moment të vështirë që ne e kemi kaluar, falë kryeministrit.

“Arrogancën e tij e ka kthyer në përparësi”, tha Sejamini.

Ndërkohë, sa i përket kryedemokratit Lulzim Basha, për Sejaminin ndryshimi i imazhit gjatë kësaj fushate nga luftarak në një udhëheqës normal, qytetar, familjar me idenë për ta kontrastuar me arrogancën  e Ramës është një element që e rriti në sytë e publikut.

“E ka bërë shumë mirë, deri në momentin e daljes së kontrollit me turmat që bërtasin me flamuj, që e kanë zbehur pak këtë fushatë pozitive”, tha Sejamini.