Kapiteni i Vllaznisë Erdenis Gurishta rezulton poztiv me COVID-19

Kapiteni i Vllaznisë Erdenis Gurishta ka rezultuar i infektuar me koronavirus.

Lajmi u bë me dije nga klubi i Vllaznisë, që njoftoi në Facebook se 25-vjeçari “do të qëndrojë i izoluar deri sa ta kalojë virusin”.

Burime për Euronews Albania bënë me dije se mbrojtësi i krahut ka pasur simptoma të lehta dhe temperaturë. Rezultati pozitiv i testit të tij dikton që e gjithë skuadra e Vllaznisë ta bëjë gjithashtu.

Ndërkohë vlen të theksohet se infektimi i tij diagnostikohet një ditë pas ndeshjes me Kukësin, që gjithashtu për të qenë e sigurt mund t’i drejtohet testeve me tamponë.

Gurishta i shtohet kështu listës së disa lojtarëve të Superiores, që janë prekur deri më sot nga COVID-19.

Te Partizani u infektuan pesë futbollistë javën e parë të korrikut. Erald Çinari, Esat Mala, Kristi Kote, Deian Boldor dhe Besnik Ferati mundën ta kalonin pa probleme infeksionin.

Në qershor ishte futbollisti i Bylisit, Eridon Qardaku që gjithashtu u diagnostikua me COVID-19 dhe mundi ta kalojë pa probleme.