Futbollisti Thiago Alcantara rezulton pozitiv me COVID-19

Futbollisti i Liverpoolit Thiago Alcantara është vënë nën izolim pasi rezultoi pozitiv me koronavirus në testin e bërë të martën nga klubi.

Njëzetenëntëvjeçari u transferua së fundmi nga klubi gjerman i Bayern Munich dhe debutoi si zëvendësues në fitoren 2-0 ndaj Chelsea.

Sidoqoftë, ai mungoi në ndeshjen e Kupës së Ligës kundër Lincoln dhe po kështu në fitoren 3-1 ndaj Arsenalit të hënën.

Në një komunikim për shtyp Liverpooli tha se Thiago “ka shfaqur simptoma të lehta të virusit, por është në gjendje të mirë shëndetësore”.

“Klubi ka ndjekur dhe do të vazhdojë të ndjekë të gjitha protokollet anti-Covid dhe Thiago do të qëndrojë në izolim shtëpiak deri sa të shërohet,” – thuhej më tej në komunikatën e klubit kampion të Anglisë.

Vetë lojtari shpërndau në Twitter komunikatën teksa shtoi se “është koha për t’u shëruar”.

Time to heal! ?? https://t.co/IeHLgxdqmm

— Thiago Alcantara (@Thiago6) September 29, 2020

Të hënën liga angleze e futbollit raportoi se të paktën 10 futbollistë kishin rezultuar të infektuar me COVID-19 në testet e fundit, çka ishte numri më i lartë i lojtarëve të infektuar që kur pandemia preku edhe sportin në muajin shkurt.

Liverpool ka në kalendar sërish përballje me Arsenalin në Kupën e Ligës, ndërsa më pas në fundjavë luan përballë Aston Villas dhe më tej më 17 tetor do të diskutojë derbin me Evertonin në Merseyside.

Lexoni gjithashtu:

Futbollisti i Milanit Zlatan Ibrahimoviç rezulton pozitiv me COVID-19