Gara për Byronë Kombëtare, kalojnë ‘filtrin’ e parë 424 kandidatë, të mërkurën testi me shkrim

Gara për Byronë Kombëtare të hetimit përmbylli fazën e parë, ku rreth 30 % e kandidatëve u skualifikuan pasi nuk përmbushnin kriteret ligjore. Gara për FBI-në shqiptare vijon të mërkurën me testimin e arsyetimit logjik.

Zyrtarë  të policisë, të hetimit të krimeve, oficerë, ish-prokurorë e studentë që kanë mbaruar juridikun, janë kandidatët që morën miratimin për të kaluar fazën e parë në garën për 60 hetuesit e byrosë kombëtare të hetimit.

Komisioni i përbërë nga 3 prokurorë të SPAK, nga 653 aplikime, kualifikoi për në fazën tjetër 424 kandidatë, ndërsa 229 të tjerë nuk plotësuan kriteret ligjore.

Etapa e dytë do të vijojë të mërkurën me testimin e arsyetimit logjik me shkrim, ku verifikimi do të bëhet me anë të pajisjes SCANTRON, e cila nxjerr automatikisht edhe fituesit, të cilët për të kaluar në fazën tjetër, duhet të marrin minimalisht 12 pikë.

Testimet e tjera përfshijnë aftësitë fizike, testin psikologjik si dhe atë të makinës së të vërtetës, ndërsa pas përzgjedhjes së 60 hetuesve më të mirë, ato do të trajnohen në akademinë e FBI-së në Shtetet e Bashkuara.