Gara për makinat elektrike, ‘Volkswagen’ do ndërtojë 6 fabrika të baterive brenda 2030-s

Nga skandali për të dhënat e manipuluara mbi emetimet e dioksidit të karbonit, në lider botëror për makinat elektrike. Kompania gjermane e prodhimit të makinave ‘Volkswagen’ bëri të ditur planet e saj ambicioze për të ndërtuar flotën më të madhe të automjeteve elektrike.

“Jemi besimplotë se pas këtij tranzicioni, ‘Volkswagen’ do të jetë një kompani akoma më e afirmuar dhe me vlerë të rritur të aksioneve të saj.

Në 2021-in, ne do të rimëkëmbemi nga COVID dhe do përshpejtojmë sërish ndryshimet”, shprehet Herbert Diess, drejtor ekzekutiv i “Volkswagen Group”.

Këtë vit kompania gjermane synon të shesë mbi 1 milion automjete elektrike, ndërsa brenda vitit 2025, ‘Volkswagen’ synon të shndërrohet në lider botëror për prodhimin e makinave elektrike.

‘Wolkswagen’ po punon edhe në zgjerimin e infrastrukturës së karikimit të automjeteve elektrike, mungesa e së cilës është parë si pengesë për shitjet e automjeteve që funksionojnë me bateri.

Prodhuesi i dytë më i madh i automjeteve në botë ka ndërmarrë një fushatë për të instaluar brenda vitit 2025, 18 mijë pika të furnizimit për makinat elektrike në Europë dhe do të ndërtojë 6 fabrika për prodhimin e baterive brenda vitit 2030.

‘Volkswagen’ po zgjeron infrastrukturën e pikave të furnizimit edhe në SHBA dhe Kinë. Deri në fund të këtij viti, do të vendosen 3500 pika të karikimit të shpejtë në Amerikën e Veriut. Në Kinë ‘Volskwagen’ synon të vendosë 17 mijë pika karikimi brenda vitit 2025. Nga ana tjetër, ‘Tesla’, konkurrenti kryesor në industrinë e automjeteve elektrike, ka 20 mijë pika karkimi në mbarë globin.