Gazetari Erl Murati: Pozitiv fakti që Lleshaj reflektoi. Jo protestave të dhunshme

Për kryeredaktorin e “Gazetës Shqiptare” Erl Murati protestat e ditëve të fundit nuk kanë lidhje me emrin e vetëm një personi, por jane pasoje e situatës së përgjithshme.

Murati tha se protestat nuk duhet të jenë të dhunshme, pasi ato dëmtojnë jetët dhe pronën publike e private.

“Është pozitiv fakti që pati një reflektim ndonëse të vonuar nga ana e ministrit Sandër Lleshaj. Protestat mund të jenë të forta, se ndaj quhen protesta. Por, jo të dëmtohen e rrezikohen jeta dhe prona”, u shpreh ai.

Ai përmendi si pozitiv edhe faktin e qëndrimit mirëkuptues të kryebashkiakut Veliaj për reagimin e një pjese të të rinjve pas vrasjes tragjike të 25-vjeçarit Klodjan Rasha nga policia.

“Ky reagim i të rinjve nuk është thjesht reagim që i drejtohet drejtësisë, gjykatave, apo reflektimit politik të qeverisë,” komentoi gazetari Erl Murati duke kujtuar problemet që hasin të rinjtë.

“S’e shoh të lidhur në vetëvete me ngjarjen dhe reagimin e shtetit, por me situatën e vazhdueshme”, shtoi ai.

“Gjithkush ka hedhur insinuatat për prapavijë politike, por kjo është e logjikshme sepse për çdo problem apo krizë zgjidhja është politike, uroj që protestat nëse vazhdojnë të mos jenë të dhunshme,” tha më tej Murati duke i shprehur ngushëllime familjes Rasha.