Gazetari Kikia e cilëson arrestimin e kryebashkiakut të Lushnjës si një hap të rëndësishëm të SPAK

Gazetari Mentor Kikia tha në Euronews Albania se arrestimi dhe ngritja e akuzave për një zyrtar lokal si Fatos Tushe, i cili ka drejtuar qytetin e Lushnjës për tre mandate dhe është funksionar i lartë politik në Partinë Socialiste, është një hap i mirë për SPAK.

“Ky është një hap për të ndezur motorët e asaj strukture që ka munguar gjithmonë në drejtësinë shqiptare”, u shpreh z. Kikia.

Ai tha se deri më sot rastet kur janë ngritur akuza kundrejt personave që kanë pushtet politik kanë qenë në momentin kur këta persona kanë rënë nga pushteti, ose kanë qenë në opozitë.

“Kemi të bëjmë me një hap të parë të kalimit të asaj që ishte konsideruar një vijë e kuqe e pandëshkueshmërisë së njerëzve të veshur me pushtet politik apo administrativ”, theksoi z. Kikia.

Kryetari i Bashkisë së Lushnjës, Fatos Tushe është arrestuar sot nga policia gjatë një operacioni të ndërmarrë me urdhër të SPAK, pasi akuzohet për shpërdorim detyre.

LEXONI GJITHASHTU:

• Zyrtarët e lartë dhe njerëzit e drejtësisë që ranë në pranga vitin e fundit
• “PS nuk është mbulesa e askujt”, kryeministri Rama reagon pas arrestimit të kryebashkiakut të Lushnjës
• Arrestohet kryetari i Bashkisë së Lushnjës, Fatos Tushe