‘Gazetaria në kohë krizash’, OSBE: Gazetarët në Shqipëri po përballen me kushte të vështira

Gazetarët në Shqipëri janë duke u përballur me kushte të vështira në ushtrimin e profesionit të tyre. Deklarata u bë nga përfaqësuesja e OSBE-së për lirinë e medias, Teresa Ribeiro gjatë konferencës që u zhvillua sot në Tiranë me temë “Gazetaria në kohë krizash” në Europën Juglindore.

Gjatë konferencës për mediet, Ribeiro foli edhe për agjencinë e medieve që u ngrit nga qeveria, duke theksuar se është një model që aplikohet në shumë vende, por nuk duhet cenuar aksesi i gazetarëve në marrjen e informacionit. Për paketën antishpifje, përfaqësuesja e OSBE theksoi se duhet pritur opinioni i Komisionit të Venecias.

“Ne jemi dëshmitarë të abuzimeve që kërcënojnë gazetarinë dhe e privojnë publikun nga informacioni. Të gjitha problematikat meritojnë vëmendje. Ne duhet të promovojmë një media të pavarur dhe shoh një nevojë urgjente që t’i dalim në krah gazetarëve që të kemi një media të pavarur”, u shpreh Teresa Ribeiro, përfaqësuesja e OSBE-së për lirinë e medias.

Nga ana e tij, kryeministri Edi Rama u shpreh se media online ka nevojë të rregullohet.

“Mendoj që kur vjen fjala për median në internet, liria e përhapjes së kësaj medie ka minuar njëfarësoj lirinë e fjalës. Të vërtetat dhe gënjeshtrat janë bërë bashkëshoqëruese”, tha kreu i qeverisë.