Gjashtë ditë protestë, qytetarët tregojnë në Euronews Albania arsyet e rezistencës

Qytetarët prej gjashtë ditësh vijojnë protestat në shenjë revolte për vrasjen e të riut Klodian Rasha. Protesta e sotme është thirrur në sheshin ‘Skënderbej” në Tiranë, por ndryshe nga ditët e mëparshme, sot vihet re një numër më i vogël protestuesish.

Gazetari i Euronews Albania, Renaldo Salianji bisedoi me disa qytetarë, të cilët treguan arsyet se pse i janë bashkuar protestës.

Njëri prej qytetarëve tha se është shoqëruar në Polici pavarësisht se ka qenë duke protestuar paqësisht. Ai thotë se do të qëndrojë në shesh deri në largimin e drejtorit të Policisë së Shtetit Ardi Veliu.

“Po, kam qenë me duar në xhepa. Protestues i lirë. Kam të drejtën time dhe të gjithë kanë të drejtën e tyre dhe këtu do rrimë deri sa të largohet Ardi Veliu”, tha një qytetar”, tha ai.

Një tjetër qytetare për mikrofonin e Euronews Albania kërkoi largimin dhe arrestimin e kreut të kupolës së Policisë së Shtetit, Ardi Veliu. Sipas saj, Policia e Shtetit duhet t’i nënshtrohet një reformë të thellë, në mënyrë që raste si vrasje e të riut të mos ndodhin më. 

“Kam dal për të protestuar. Kërkojmë drejtësi për Klodianin, të dorëhiqet dhe të arrestohet Ardi Veliu dhe të lirohen ato që janë arrestuar. Kërkojmë reformimin në polici. Jo unë jo, por ka njerëz që frikësohen. Të gjithë duhet te jemi në shesh sonte.

Prezencën në protestë një qytetar tjetër e justifikon me faktin se në Shqipëri ka korrupsion të lartë, dhe ky fenomen sipas tij duhet mposhtur.

“Këtu ka një korrupsion të lartë. Këtu bëhet fjalë për të zhdukur historinë e qytetit. Këtu ka një kod moral, këtu nuk shkelim se duam të shkelim rregullin, këtu janë bërë krime dhe ne po protestojmë. Me aktin që është bërë me atë djalin, dashje apo pa dashje është kriminalizuar e gjithë policia. Unë bëj thirrje që protestat të mos ndalojnë asnjëherë”, tha një tjetër.