Gjashtë të vdekur nga Covid-19 në Kosovë

Gjashtë qytetarë të infektuar me Covid-19 kanë ndërruar jetë në Kosovë gjatë 24 orëve të fundit. Lajmi bëhet i ditur nga Instituti Kombëtar i Shëndetit Publik, i cili thotë se nga 3444 teste të kryera, 565 prej tyre janë konfirmuar pozitivë.

Që prej fillimit të pandemisë autoritetet kosovare raportojnë për 1702 jetë të humbura dhe mbi 77 mijë të prekur nga coronavirus.

“Numri total i rasteve pozitive është 77.253  raste nga 354.967 persona të dyshimtë në virusin SARS-CoV-2 dhe 1.702 raste të vdekjes. Gjatë 24 orëve të fundit, janë shëruar 304 pacientë derisa numri i përgjithshëm i të shëruarve deri më sot është gjithsej 64.666 raste, kurse numri i rasteve aktive është 10.885”, thekson IKSHPK-ja.

Rastet pozitive janë nga komunat:

Prishtinë 231 raste, Pejë 44 raste, Ferizaj 35 raste, Gjakovë 32 raste, Mitrovicë 31 raste, Gjilan 22 raste, Fushë-Kosovë 21 raste, Vushtrri 20 raste, Kamenicë 18 raste, Obiliq 15 raste, Podujevë 12 raste, Viti 10 raste, Prizren 9 raste, Drenas 8 raste, Lipjan 8 raste, Skenderaj 8 raste, Suharekë 8 raste, Deçan 6 raste, Rahovec 5 raste, Graçanicë 4 raste, Novobërdë 4 raste, Istog 3 raste, Klinë 3 raste, Dragash 2 raste, Kaçanik 2 raste, Kllokot 2 raste dhe me nga një rast komunat Hani i Elezit dhe Shtërpcë.

Përkundër rasteve të infektimeve që vijojnë të jenë të larta, Kosova nuk ka arritur ende të sigurojë asnjë dozë vaksine për të luftuar agresivitetin e virusit.14