Gjashtë të vdekur nga Covid-19 në Kosovë

Autoritetet shëndetësore në Kosovë raportojnë se në 24 orët e fundit kanë humbur jetën gjashtë pacientë të prekur me Covid-19, ndërsa nga kryerja e 1417 testeve të dyshuara, 309 prej tyre janë konfirmuar pozitivë.

Këto të dhëna janë publikuar nga Instituti Kombëtar i Shëndetit Publik, i cili konfirmon se deri tani numri total i viktimave ka shkuar në 1363.

“Numri total i rasteve pozitive është 52.943 raste nga 192.296 persona të dyshimtë në virusin SARS-CoV-2 dhe 1.363 raste të vdekjes. Gjatë 24 orëve të fundit, janë shëruar 601 pacientë derisa numri i përgjithshëm i të shëruarve deri më sot është gjithsej 44.436 raste, kurse numri i rasteve aktive është 7.144”, njofton IKSHPK-ja.

Rastet pozitive:

Prishtinë 126 raste, Ferizaj 25 raste, Podujevë 19 raste, Vushtrri 19 raste, Mitrovicë 14 raste, Gjakovë 12 raste, Viti 11 raste, Malishevë 10 raste, Deçan 9 raste, Gjilan 7 raste, Pejë 7 raste, Prizren 7 raste, Fushë-Kosovë 5 raste, Istog 5 raste, Kaçanik 4 raste, Klinë 4 raste, Lipjan 4 raste, Suharekë 4 raste, Drenas 3 raste, Junik 3 raste, Obiliq 3 raste, Kamenicë 2 raste, Rahovec 2 raste, Shtime 2 raste dhe me nga një rast komunat Graçanicë dhe Skenderaj.

Në buletinin ditor mbi pandeminë Ministria e Shëndetësisë kërkon nga qytetarët të tregohen të kujdesshëm, të respektojnë masat dhe të shmangin ato vende, ku vihen re grumbullime masive të qytetarëve. Sipas ekspertëve shëndetësorë, masa të tilla janë të thjeshta, por tepër të rëndësishme për të penguar përhapjen masive të COVID-19 në popullatë.