Gjatë qershorit janë shkrumbuar 223 hektarë me pyje dhe shkurre në Shqipëri

Zjarret e shkaktuara prej temperaturave të larta, verën e kaluar dogjën 2.996 hektarë pyje dhe shkurre, ndërsa për muajin qershor të këtij viti deri tani janë regjistruar 223 hektarë të djegur.

Në 61 bashkitë e vendit ka shërbim zjarrfikës, ku janë të angazhuar 1180 punonjës, ose ndryshe 1 zjarrfikës për 2398 qytetarë.

Sipas të dhënave të ministrisë, çdo qytet ka minimumi 1 automjet zjarrfikës dhe 13 punonjës profesionistë, përjashtuar, Tiranën, Durrësin dhe Fierin, ku numri i automjeteve shkon në 12.

Jo më larg se 4 vite, në 2017, për të bërë të mundur shuarjen e zjarreve të përhapura në disa qytete, në ndihmë erdhi shteti fqinj Greqia, e cila nisi helikopter për t’ju bashkuar ekipeve tona.

Verën e kaluar, në fund të korrikut dhe fillim gusht zjarret u përhapen masivisht në Shkodër, Lezhë, Kukës dhe Dibër.

U desh gati një jave për të shuar flakët që përfshinë pyjet në malin e Tomorit.

Në Parkun Kombëtar të Malit të Tomorit u angazhuan 50 forca zjarrfikëse dhe ushtrie, dhe një helikopter.

Ndërsa në zjarrin që ka nisur të enjten në Piken kufitare të Gërçarit në Shkodër, janë angazhuar 5 efektive të repartit zjarrfikës dhe një automjet.

Por, rastet e kaluara të zjarreve, sidomos ato gjatë verës kanë treguar që lufta me to është e vështirë, e bëhet akoma më shumë kur nuk janë të mjaftueshme burimet për t’i përballuar.

Ministria e Brendshme në raste të emergjencave natyrore, disponon vetëm dy helikopterë.

LEXONI GJITHASHTU:

• Flakët shkrumbojnë pyjet dhe shkurret e fshatit Vermosh
• Shkrumbohen 2 hektarë pyje dhe shkurre në Vithkuq të Korçës
• Mali i Tomorit në flakë prej 5 ditësh, kryebashkiaku i Poliçanit: Të ndërhyjë menjëherë ushtria