Gjendja epidemiologjike e COVID-19 në Kosovë raportohet e qëndrueshme

Autoritetet shëndetësore thonë se në 24 orët e fundit nuk është regjistruar asnjë humbje jete në Kosovë.

Të dhënat janë bërë publike nga Ministria e Shëndetësisë, sipas të cilës janë kryer 1.105 testime, ndërsa 3 qytetarë kanë rezultuar pozitivë me virusin COVID-19.

Prej ditësh situata epidemiologjike në Kosovë raportohet e stabilizuar dhe këtë e dëshmojnë rastet e të shëruarve.

Listës totale të të shëruarve gjatë orëve të fundit i janë shtuar pesë qytetarë, kurse totali i të shëruarve ka shkuar në 105.381, që nga fillimi i epidemisë.

Prej fillimit të vaksinimit në të gjitha qytetet e Kosovës janë injektuar 206.443 doza vaksinash.

Qyteti më i prekur në Kosovë nga epidemia është Prishtina, e cila raporton numrin më të lartë të viktimave dhe të rasteve të reja.

Sipas Ministrisë së Shëndetësisë, deri tani 2,261 qytetarë  kanë humbur jetën për shkak të komplikacioneve të infeksionit të COVID-19.

LEXONI GJITHASHTU: 

• Mbërrijnë ​në Kosovë dozat e para “Pfizer” të blera nga qeveria Kurti