Gjermania heq kufizimet për udhëtarët nga Shqipëria, por me një kusht

Sikundër u njoftua dy ditë më parë, që prej ditës së sotme, Gjermania ka vendosur të heqë kufizimet e hyrjes së udhëtarëve shqiptarë në territorin e saj.

Por, kalimi bëhet vetëm duke plotësuar një prej tre kushteve. Të cilat janë: test për COVID-19, dëshmi që udhëtari e ka kaluar sëmundjen apo është vaksinuar me një nga vaksinat e njohura nga Agjencia Evropiane e Barnave Pfizer, Moderna, AstraZeneca dhe Johnson & Johnson.

Për udhëtarët, që hynë në Gjermani në rrugë ajrore, vazhdon të jetë në fuqi detyrimi i një testi përpara nisjes (test PCR deri në 72 orë përpara fluturimit ose test antigen deri në 48 orë përpara fluturimit).

Udhëtarët e vaksinuar, të cilët zotërojnë një dokument që provon vaksinimin apo shërimin, i formuluar në gjuhën gjermane, angleze, franceze, italiane apo spanjolle, në versionin print apo atë digjital, nuk është e nevojshme të paraqesin një test negativ në momentin e hyrjes në rrugë ajrore nga Shqipëria në Gjermani.