Gjykata Administrative i kthen kompanisë së Lulzim Berishës licencën për tregtimin e naftës

Gjykata Administrative i ka kthyer kompanisë “Rajan 2007” në pronësi të Lulzim Berishës licencën për tregtimin me shumicë të naftës, gazit dhe nënprodukteve të tjera.

Gazetari i Euronews Albania, Merin Maçi, raporton se vendimi në favor të kompanisë së Lulzim Berishës është marrë tre javë me parë, konkretisht më 26 tetor. Ndërkohë më herët Gjykata e Posaçme i ktheu dhe makinën e blinduar të sekuestruar nga OFL-ja.

Operacioni “Forca e Ligjit” i bllokoi Lulzim Berishës në maj të këtij viti një sasi prej 1.2 milionë litra naftë dhe një magazinë doganore në Durrës, por pas vendimit të Gjykatës Administrative, kjo sasi e bllokuar tashmë do t’i kalojë Lulzim Berishës.

“Së bashku me Strukturat e Specializuara të Hetimit Financiar në Policinë e Shtetit dhe Doganat, në vijim të luftës kundër informalitetit, evazionit, ushtrimit të aktiviteteve të palicencuara dhe abuzimeve me tregun e hidrokarbureve, mbrëmjen e djeshme OFL sekuestroi 1,2 milion litra naftë  dhe një magazinë doganore, në Durrës, në pronësi të subjektit privat L. B. & E. SH”, njoftoi policia.