Gjykata e Arbitrazhit redukton pezullimin e Rusisë nga aktivitetet ndërkombëtare në sport

Gjykata e Arbitrazhit përgjysmoi sot pezullimin e Rusisë nga aktivitetet ndërkombëtare sportive, megjithatë ajo nuk do të marrë pjesë në lojërat olimpike dhe kampionatin e ardhshëm botëror.

Pezullimi është reduktuar në dy vite dhe kjo do t’i ndalojë Rusisë përfaqësimin në Lojërat Olimpike të Tokios që do të zhvillohet vitin e ardhshëm, botërorit të futbollit Katar 2022 dhe Lojërave Dimërore Pekin 2022.

Në vitin 2019 Rusia qe ndëshkuar me 4 vite pezullim për shkak të skandalit të zbuluar në vitin 2014 të dopimit sistematik të sportistëve dhe manipulimit të testeve anti-doping nga autoritetet ruse.

Tashmë pezullimi do të zgjasë deri më 16 dhjetor 2022, ndërsa Rusisë do t’i lejohet të marrë pjesë në Kupën e Evropës – Euro 2020, që për shkak të pandemisë u shty për vitin e ardhshëm, – kjo pasi organizimet e UEFA-s, sipas përcaktimeve të pezullimit, nuk bëjnë pjesv në “evente madhore ndërkombëtare”.

Agjencia Ndërkombëtare Anti-Doping (WADA) iu drejtua zyrtarisht në janar 2019 autoriteteve ruse duke i kërkuar bashkëpunim dhe transparencë për të zbërthyer tërësisht çështjen e manipulimit të rezultateve të laboratorëve për sportistët e saj.

Rreth dymbëdhjetë muaj më pas, pasi autoritetet ruse vijuan të mohonin manipulimet e rezultateve, WADA vendosi pezullimin prej katër vitesh të sportistëve rusë në aktivitetet ndërkombëtare. Asokohe kryeministri Dimitry Medvedev e cilësoi pezullimin si pjesë të një “histerie kronike anti-Rusi”.

Dënimi i Rusisë nuk i ndalon sportistët e ndershëm që të marrin pjesë në aktivitete ndërkombëtare. Një numër prej 168 sportistësh garuan pa flamur, në pozita neutrale, në Lojërat Dimërore të Koresë së Jugut.