Gjykata Evropiane: Të rimbursohen turistët që nuk morën shërbimet gjatë pandemisë

Udhëtarët paketat turistike të të cilëve u anuluan si pasojë e kufizimeve për të luftuar pandeminë e COVID-19 mund të kenë të drejtë për një rimbursim të pjesshëm.

Kështu ka deklaruar të enjten Gjykata Evropiane e Drejtësisë, pasi iu kërkua një opinion lidhur me çështjen nga një gjykatë në Gjermani.

Kjo e fundit po shqyrton rastin e dy personave që kishin blerë një paketë 2-javore pushimesh për në ishullin spanjoll Gran Kanaria, për më 13 mars 2020, kur pandemia sapo kishte prekur Evropën.

Ata kërkojnë një reduktim prej 70 për qind të çmimit për shkak të kufizimeve që u vendosën dy ditë më vonë dhe për shkak të kthimit të tyre të parakohshëm.

Kur u vendosën kufizimet më 15 mars, plazhet u mbyllën, u zbatua një shtetrrethim dhe paditësit u lejuan të dilnin nga dhoma e hotelit vetëm për të ngrënë, deklaroi gjykata e BE-së.

Ndërsa dy ditë më vonë, ata u detyruan të ktheheshin në Gjermani. Operatori turistik refuzoi të bënte rimbursimin me argumentin se nuk mund të konsiderohet përgjegjës për atë që ndodhi.

Por Gjykata Evropiane e Drejtësisë konstatoi se një udhëtari i takon reduktimi i çmimit të paketës së tij në rastin kur shërbimet që përfshin ajo nuk zbatohen për shkak të kufizimeve, siç ndodhi në rastin e COVID-19.

Institucioni theksoi se, nuk ka rëndësi nëse kufizime të tilla vendosen në vendin e banimit të udhëtarit, apo në vende të tjera.